هزار جریب همه جا باصفاهه

گیاهانش امه درد دواهه

زولنگ واوجی و مارنبو دارنه

دره و چشمه ورود وکوه دارنه

هزار جریب هوای عالی دارنه

تشی و کوتر و بابلی دارنه

شو که وونه ستاره ها دیاره

آدم کیف کانده هشنه هواره

نما شون که وونه خله شلوغه

صدای سگ وخر اسب وبوقه

هزار جریب همه جا سبزه زاره

بهترین جا کنا ر چشمه ساره

بخاری هیمه ای هم مزه دارنه

مثل عروس هسته که نمزه دارنه

زمستون هکانی بخاری ره تش

بهیری بالشت‌ها ره بزنی کش

دکانی چایی ره تک تک پیاله

بخوندی مازنی با سوز وناله

صدای نی دپیچه روستاره

صداره سر هادی اخ چنده خاره

دو اش هزار جریب مزه دارنه

مثل پنبه که خله غوزه دارنه

تندیر نون و پلا و آغوز حلوا

وزوار لبلبو و اون مربا

دیگه بسه دیار ،نواشی خسته

هزار جریب برار،خله خب هسته

عزیز ریاحی/دیار